События

Халык уеннары, спорт ярышлары, җыр-моң: Арчада Сабантуй гөрли

Бәйрәм мәйданының милли йортларындагы фольклор күренешләре һәм  «Милләтебез күрке - Сабантуй» прологы һәр килүчегә рухи ял бүләк итте.  

Арча муниципаль районы башлыгы Илшат Нуриев һәм мөхтәрәм кунакларны районыбыз халкы милли йолалар барлап, сый-хөрмәт белән каршы алды. Район башлыгы кырларда намус белән эшләгән һәркемгә рәхмәт әйтте, барлык райондашларны Сабантуй бәйрәме белән тәбрик итте.

Сабан туе әләмен үткән елгы кыр батыры Данил Рәхимов һәм көрәш батыры Альберт Ситдыйков күтәрделәр.

ТРның Мәдәният министры урынбасары Ленар Хәкимҗанов Республикабыз Рәисе Рөстәм Миннехановның котлау һәм рәхмәт сүзләрен җиткереп, районыбыз халкын бәйрәм белән котлады.

"Сабан батыры-2023" исеменә лаек булган егетләр - авыл хуҗалыгы тармагын үстерүдә озак еллар нәтиҗәле, тырыш  хезмәт куючы механизаторлар сәхнәгә күтәрелде. “Игенче” ширкәтеннән Нияз Йосыфҗанов, “Кырлай” ширкәтеннән Раил Гомәров, “Северный” ширкәтеннән Марсель Фәхриев, 51 ел хезмәт стажы булган “Тукай” хуҗалыгы ветеран механизаторы Фәрит Хәкимҗанов, “Курса МТС”ы ширкәтеннән иң яшь механизатор Илнар Камалов “Абсолют чәчү батыры – 2023” исеменә лаек булып, Рәхмәт хатлары һәм акчалата премияләр белән бүләкләнделәр. Шулай ук алдынгы сыер савучыларга, механизатор һәм терлекчеләргә район башлыгы бүләкләр һәм Рәхмәт хатлары тапшырды.

Мәйданга бизәлгән җигүле атлар кертелде.

Бәйрәм сәхнәсен Татарстанның халык артисты ИлСаф үзенең җырлары белән бизәде. 

Тулырак: http://arskmedia.ru/news/rayon-yaalyklary/saban-tue-acylysy-milli-iortlar-kyr-batyrlary-ham-igule-at...

Берәүләр Сабантуйга көрәш, ат чабышы карарга дип килсә, икенчеләр, бигрәк тә балалар, күңел ачу ягын карый.

Арча стадионында күңелле уеннар, япорт ярышлары белән үзешчән артистларның җыр-моңнары астында Сабантуй гөрли. Берәүләр Сабантуйга махсус көрәш карарга дип килсә, икенчеләргә халык уеннары, спортчыларга – спорт ярышлары, ә сәнгать сөючеләргә – җыр-бию кызык. Сабантуй мәданында һәркем күңеленә хуш килгәнен таба ала.

Сабантуй мәйданына керү юлында кече сәхнәдә бәйрәм кунакларын балалар үзләренең моңлы җыр-биюләре белән каршы алып тора. Бу Арча сәнгать мәктәбе укучылары. Милли киемнәрдән сәхнәне гөрләтеп бииләр дә, җырлыйлар да. Профессиональ артистлар бер якта торсын. Афәрин, яшь моң ияләребез!

Төп мәйданда исә Сабантуйның бизәге – милли көрәш белән бергә башка спорт ярышлары, халык уеннары гөрли. Шунда гына спортчылар гер күтәрүдә көчләрен сыный, кул көрәшендә ярыша, теннис уйныйлар, авыш колга башына менәләр, җитез генә авыш колга буйлап элдерәләр, аркан,таяк тартышалар. Алар белән беррәттән халык уеннары гөрли: балалар, өлкәннәр,чират торып, чиләк-көянтә белән су ташыйлар, күзләрен бәйләп чүлмәк ваталар, капчык киеп,кашыкка йомырка куеп йөгерәләр, катыктан акча эзлиләр... Барлык уеннарны санап табетерәторган түгел. Төп мәйданнан читтә волейбол, баскетбол, мини-футбол мәйданчыкларында уеннар гөрләп тора.

Җыр-биюсез Сабантуй буламыни? Аерым сәхнәләрдә Сабантуй кунакларын районыбызның үзешчән сәнгать осталары, вокаль бию ансамбльләре сәламләде.

Ә мәйданнан читтә балалар өчен төрле аттракционнар, батутлар, тир эшләп торды. Монда инде балаларның барысы да – кечерәкләр дә, олыраклар да үзләренә ошаган күңел ачу чарасын таба ала иде. Алар өчен бәйрәмнең иң кызык мизгелләре дә шулдыр, мөгаен.

Тулырак: http://arskmedia.ru/news/rayon-yaalyklary/xalyk-uennary-sport-iaryslary-yr-mon-arcada-sabantui-gorli